පෙර දිනෙක රාත්‍රියෙ
 වෙඩි වැදුණු හඳපාන
 තවම නුබ ගැබ ඉඳන්
 කඳුළු සලනවා ඇති


කටු පඳුරු අතර හිඳ
 පිපෙන්නට වෙර දැරූ
 මල් කැකුළු වල පැතුම්
 තවම තියෙනවා ඇති


කාස්ටක සුවඳ මුසු-වැලි කතර කොනක තව
 කුංකුමං පොට්ටුවක්-පිච්ච මල් ගෙත්තමක්
 අලුත් හිරු එන තුරා
 තවම මග බලනවා ඇති


තල් අරණ මුදුනතේ
 පිපුණු තල් මල් සුවඳ
 දෙවුන්දර තුඩුවටත්
 දැනෙනව ද දන්නේ නැති




-රිද්ම එරංග-

නීතියේ සොඳුරු රුවැති යුවතිය
දෑස් වසා සිටී උපන් දා සිට
අතෙකින් කඟපතක් ද
අතෙකින් තුලාවක් ද ගෙන
කිරා මැන පසිඳලන්නට යුක්තිය.....
          **********************
බොහෝ කලෙක සිට දැන්  ඇය
ගැබ්බරව ඇත


කවුරුන් වේ ද ඒ දරු?
කවුරුන්ගේ ද ඒ දරු?
කෙසේ හෝ දැන් ඇය මවකි....






-රිද්ම එරංග-